كيف اتخلص من التوتر | نصائح علميه للتخلص من التوتر

سلاااام :)


مين فيكم تعاني من التوتر .. لما اقول توتر ما اقصد التوتر الطبيعي اللي يخليك تنجزين ! اقصد النوع السيء من التوتر اللي يخليك ما تعرفين تسوين شي !!
انا اترأس القائمه في النوع الثاني مع الاسف :(
ايه نعم : انا انسانه التوتر لاعب فيها لعب :(

الترم اللي راح عشت اغرب احاسيس في الحياه من زود التوتر : ماانام لاني من كثر ما انا متوتره ارتجف ! ما اقدر اكل اببد ! ما اقدر اذاكر او اراجع حتى لو كان باقي على الاختبار كثيييير ! .. احاسيس كثيره ابد ابد مو طبيعيه

اتخذت قرار اني احارب التوتر الغبي هذا اللي يجيني فترة الاختبارات بكل ما عندي من قوه ، بحثت كثييير عن التوتر و كيفية التخلص منه ..
النيه كانت اني انزل لكم البوست هذا بعد ما اجرب هالطريقه بنفسي ، لكن اذا ما نزلت هالموضوع ايام الاختبارات خلاص ماله داعي :|
عشان كذا قلت انزله لكم الحين ، وعلى فكره انا  جربت هالطريقه في اول اختبارين ومرره فادت معي و باذن الله راح تفيدكم

يالله نبدأ :)





ايش هو التوتر ؟
هو ردة فعل الشخص النفسيه و الجسديه و العقليه تجاه امر معين ..اختبارات او مشاكل اسريه او مشاكل صحيه او حتى صراعات داخليه

ردود فعل البشر تكون يا سلبيه يا اجابيه زي ما ذكرت فوق : 
ايجابيه يعني توتر يحثك على الانجاز
او سلبيه يعني تدمرك .. و هذا النوع اللي راح اتكلم عنه اليوم : التوتر السلبي او (( طاعون العصر ))
ليش سموه كذا؟؟
لان العلماء اكتشفوا ان التوتر السلبي يزيد من نسبة اصابتك بالامراض الخطيره بنسبة 80% 
و انه يزيد من نسبة زيارتك للطبيب الى 70%
ككل ذا سببه التوتر السلبي .. طيب اش هو التوتر السلبي ؟
التوتر السلبي هو التوتر اللي يخليك ماتعرفين تنجزين ! و يخليك تفقدين قدرتك على كل شي ..

الاعراض الفسيولوجيه ( الجسديه ) للتوتر تصير للانسان لما يحس  بالخطر ! سواء كان هالخطر واقعي او يتخيل ان في خطر .. لما الجسم يحس بالخطر يبدأ يفرز هرمونات منها هرمونات التوتر اللي هم ( الادرينالين  و  الكورتيزول ) يسببون  الاعراض التاليه ::

تعب في العضلات
تسارع دقات القلب 
تقلبات الجهاز الهضمي 
ارق
فقدان الصبر 
الحزن و الاكتآب
الاحساس بالوحده
عدم القدره على التفكير و التركيز
ضعف الاستيعاب و النسيان
اختفاء الابتسامه
اضطراب الاكل و النوم
الغضب 
التسويف : يعني التأجيل 

ممكن تعانين منها كلها او من بعضها



علمياً : الجسم يتدمر لما تتوترين لفتره طويله لانه :

 - يعطل المناطق المسؤوله عن التركيز و التفكير

- يقلل من انتاج الخلايا المناعيه او يدمرها ، عشان كذا قلت في البدايه ان الامراض تزيد مع التوتر :(

- يسبب صداع : نتيجة اضطراب جريان الدم في الاوعيه لدمويه في الدماغ


طيب نجي الحين للـ حلول ، مشكلتنا الحين التوتر .. ضد التوتر الاسترخاء ! اذاً الحل هو الاسترخاء
عشان اتخلص من التوتر لازم اكون مسترخيه .. و الاسترخاء يعطيني عكس الاعراض السلبيه اللي ذكرتهم فوق ، بشكل عام الاسترخاء يزيد من قدرتي على التقاط المعلومه ويزيد من  كفائتي في العمل

 اشياء تساعدك على الحد من التوتر و تساعد على الاسترخاء :

- الحركه و الرياضه : جربي نططي او سوي يوغا ، صددق رااااااحه

- التنفس السليم : علمياً : التنفس السليم يعالج الكثير من الامراض و يساعد على الاسترخاء و الهدوء النفسي ،
 اللي هو انك تاخذين نفس عميق من الانف و تطلعينه من الفم

- النوم : خذي كفايتك و حاجتك اليوميه من النوم

- البعد من السهر : ابرز مشكله للتوتر .. ماا تتتخيلون كيف السهر يوتر :(

- البكاء : اذا في خاطرك بكوه ! طلعيها هههههههه لااا تمسكين دموعك ! اذا في خاطرك شي ابكي لان علمياً الدموع تخفف من الضغوط النفسيه ( لان البكاء يؤدي الى افراز هرمون الاندروفين اللي يعمل كـ مخدرطبيعي )

- اهتتمي بتغذيتك و ركككزي على الاكل الغني بالفيتامينات : زي الخضار الورقيه و الفواكه لانها غنيه بـ ( فيتامين B + المغانيسيوم + السيراتونين ) موجوده في الفواكه و الخضار و السمك و الحليب و المكسرات زي اللوز .. وابعددي عن الاكل الدسم

- التأمل في الطبيعه و اليوغا : لانهم يساعدون على الاسترخاء

- الاكثار من شرب الماء : بما ان 83% من الدم ماء و 90% من الدماغ ماء ... فـ طبيييعي جداً ان نقص شرب الماء يسبب ضعف في قدراتك !

- اخر و افضل شي ، الروحانيات و الصلاه و التعبد باي شكل كان عشان ترتاحين


حطي في بالك : كل الناس يواجهون نفس الموقف ، كل الناس يختبرون مو بس انا وانتي !
الفرق ان لكل شخص طريقته الخاصه في التعامل مع امور حياته ..
الناس المنجزه هم الناس الرايقه الهاديه اللي ماخذه الامور بسهاله
و الناس المتعثره هم الناس المتوتره الكئيبه اللي تكبر المواضيع و تعطيها فوق حجمها !

علمياً : الحياه مرتبطه بالنفسيه ! العلم و الدين و كل شي يحث على الايجابيه و التفكير بمنظور ايجابي .. و كل اللي طبق الكلام اللي ينقال عن الايجابيه لاحظ الفرق ! مافيه اي شخص طبق عملياً الكلام الايجابي و مافاد معه !!


العلم الحديث ينصح بالاتي :

١- انك تشووفين الاشياء بإيجابيه لان هالشي راح يؤدي الى الاسترخاء

٢- ابتسمي :)
علمياً : الابتسامه و الضحك افضل سلاح ضد ضغوط الحياه : لانها تمنع وصول الاشارات السلبيه بما فيها التوتر  للمخ

هالمعلومات اللي اثبتوها العلماء بعد العديد من الدراسات و التعب اثبتها الدين قبل ١٤٠٠ سنه :)
ربي قال : " أَنَا عِنْدَ ظَنِّ عَبْدِي بِي إِنْ ظَنَّ بِي خَيْرًا فَلَهُ وَإِنْ ظَنَّ شَرًّا فَلَهُ "
مين اللي يقرا هالحديث و ما يتفائل ؟؟؟؟؟
احسني الظن بالله حطي في بالك ان ربي رحيم و يحبك و كاتب لك الخيير فماله داعي اشيل هم و اخاف من الجاي 

اما بالنسبه للضحك فالاسلام حث كثير على الابتسامه و الضحك .. اصلاً يكفي ان ديننا هو الدين الوحيد اللي الابتسامه فيه صدقه :)

.

طيب انا تكلمت عن التوتر بشكل عام ، لكن الحين ابغى اخص التوتر الدراسي بالكلام :

الحل العلمي الوحيد لتوتر الاختبارات هو : تقليل الاهميه الفكريه + تقليل الاهميه العاطفيه 

-تقليل الاهميه الفكريه يعني :
تهونين موضوع الاختبار و الدرجات في نفسك ، مثلاً :
لو تفكرين فيها بمنطقيه : ترا الدرجات ذي اللي انتي تجمعينها و خايفه عليها و خايفه منها هي درجات دنيا ، يعني لا بتدخلك الجنه و الا بتوديك النار ! .... الخ من الافكار المشابهه

- تقليل الاهميه العاطفيه : مرتبطه بتفكيري و تصرفاتي .. يعني انا ايش اسوي عشان اتوتر ؟
التغذيه السيئه : تلعب دور كبير في زيادة التوتر
الاصحاب القلقين : تأثيرهم قوووي جداً عليك .. نصيحه اول ما تبدأ المراجعه اطلعي من قروب الدفعه هههههههههههه انا والله طلعت منه من قبل شهر لانهم جدد يوترووون الواحد :(
السهر : انتي تسهرين ؟ اذاً طبيعي انك تتوترين :) جربي تنامين و تذاكرين الصباح ، ووالله مافيه مثل مذاكرة الصباح
"هنا تدوينه تكلمت فيها عن كيف تكونين انسانه صباحيه :) طلي عليها اذا حابه : http://rodybeauty.blogspot.com/2016/02/blog-post_26.html"


نصائح عامه للمذاكره :

- كلي الجوز قبل الاختبار : سوو دراسه على طلاب ، خلوهم ياكلون جوز و قارنوا حلول اللي اكلوا الجوز باللي ما اكلوه ،، و وجدوا ان اللي اكلوا الجوز حلولهم افضل بثلاث مرات من اللي ما اكلوا

- الدارك تشوكلت :) 
تعطي مشاعر جميله و تروق فبالتلي اكون مروقه فبالتالي يكون اختباري اجمل :)

- التنفس السليم :  طريقه علميه معروفه لتنشيط مناطق من الدماغ اللي هي انك تقفلين باصبعك فتحت الانف اليمين و تاخذين نفس عميق عشان تنشطين الجزء الايمن من الدماغ .. و تقفلين فتحت انفك اليسار و تاخذين نفس عشان تنشطين الايسر من الدماغ

وبسس :)
هذي البحوث اللي سويتها لنفسي و قلت اشارككم اياها
مصادري : د.وليد فتيحي + د.سميه ناصر
اتمنى اني افدتكم او امتعتكم 
احبكم 
xoxo