المسك و انواعه و استخداماته

سلاااام :)

كيف حبيباتي اليوم :)

اليوم باتكلم عن اكثر شي احبه .. حرفياً اموت عليه :(

الا وهو ( المسك السائل )

محدثتكم وحده تموت على ريحة المسك ، لدرجه لما اشم ريحة المسك او اي ريحه حلوه عادي جداً تدمع عيوني من الخقه ههههههههههههههههههههههههههههه

المسك السائل  تعرفت عليه قبل ثلاث سنوات بعد ماقريت موضوع للجميله شيماء في مدونتها حمستني اجربه .. واول ماجربته وقعت في غرامه على طوول 

كنت استخدمه قبل اروح الدوام كل يوم (والى الان) مااستغني عنه ابد 

مالكم بالطويله 

يالله نبدأ :)

اش المميز في المسك وليش احبه ؟!

١- لان ثباته جميييل .. لما احطه احسني فواحه احس ريحته تطلع منه تفووح مدري كيف اوصف بس احساس جميل 

( شطحه ) اذكر اول مابديت استعمله سلمت على وحده من زميلاتي في الفصول الثانيه .. بعد ماسلمت رجعت حطت خدها على خدي و سلمت مره ثانيه ! طبعاً استغربت ! قالت لي : رغد كل مااسلم عليك اشم فيك حلوه ايش هي ؟ 

طبعاً على طوول عرفت انها تقصد المسك 

من بعد هالموقف ادمنت المسك السايل وصرت مااستغني عنه ابد  لان انا جسمي من الاجسام اللي ماتثبت فيه الروايح ابداً .. لكن المسك ثبتت ريحته فيني اكثر من اي شي ثاني  فمستحيل استغني عنه 

و بما اننا فتحنا طاري الثبات فحطوا في بالكم الثبات يختلف من شخص لشخص ، و برضه الثبات يختلف من مسك لثاني ، فـ فيه بعضهم يكونون مرره ثابتين و بعض الانواع لا 

٢- ان ريحة المسك تختلف من شخص لاخر .. بالضبط تختلف ، كيف ؟!

المسك السايل لما تحطينه على جسمك يتفاعل مع فرموناتك الخاصه فينتج ريحه مميزه خاصه فيك ..  يعني المسك تختلف ريحته اختلاف بسيط  من شخص لاخر 

طيب ايش الانواع اللي جربتهم ؟!

جربت مسك عبد الصمد القرشي و مسك اجمل 

 اللي اعجبوني من عبد الصمد القرشي  :

١-  مسك الختام  : ريحته مميزه مرررره ..  فخم و ناعم ومميز في نفس الوقت ، ماتنوصف ريحته صراحه بس احسها تعجب جميع الاذواق 

٢- مسك ارزة لبنان : ريحته مسك على ورد ، ج م ي ل ه جددداً ، حبيته مع اني مو من محبي الورد ، لكن هذا غغير جد ، احس ريحته منعشه اللي تحب الورد لاتفوته 

٣- مسك العروس : ريحته باختصار نظافه ، انتعاااش مره 

٤- مسك العود : استعمله للمناسبات .. ريحته عوده مخففه ، يعني ريحة العوده الفخممه بس على خفيف يعني مافيها ريحة العوده القوييه المزعجه اللي تحسينها رجاليه .. هالتوله جمييييله جدداً للبنات اللي يحبون العوده

اما بالنسبه للي اعجبني من اجمل :

١- مسك مكه : يذذبح ريحته مررره تمثلني 

عارفين الريحه النظيييفه اللي فيها نقطة فخامه ، هذا هو 

مررره يجنن بس للاسف ، الزين ما يكمل ، بالنسبه لي ثباته شبه معدوم :"(

٢- مسك العروس : ريحته نظااااافه ريحته صابون غسيل ، لما تحطينه تحسين نفسك توك طالعه من الشاور 

٣- مسك روز : ريحة نظااافه بس على عطور شويه 

بالنسبه للثبات ؛

زي ماذكرت فوق الثبات يختلف من شخص لاخر و من نوع مسك لاخر ، انا ماتثبت فيني الروائح للاسف

بس بشكل عام حسيت مسك عبدالصمد القرشي يثبت فيني اكثر من غيره 

استعماله :

طريقتي انا : احطه على اماكن النبض + استعمله كخمرية شعر + نقط على حجاب الصلاه 

- احطه على اماكن النبض عشان يثبت لوقت اطول 

- وبعد مااطلع من الشاور وشعري لسه مبلول احط منه على اطراف اصابعي و افركه بعدين احطه على شعري اللي ورا الاذن .. ليه ؟ 

لانه يوسخ الشعر ، عشان كذا ما احطه في اماكن واضحه يطلع منظر شعري وسخ ، فاحط منه شووي وفي اماكن مو واضحه عشان يعطي شعري ريحه جمميله 

بالنسبه لاسعاره فتختلف على حسب حجم التوله .. اصغر توله ب٦٠﷼ .. يعني كل ماكبرت التوله كل مازاد السعر 

انا دايم اخذ اصغر حجم .. لاني من النوع الملول  فـ مره اخذ مسك الختام ولما يخلص اخذ مسك ارزة لبنان وبعدها اجرب شي جديد وكذا يعني 

طالبه او معلمه او موظفه او ربة بيت .. وييين ماكنتي و مهما كان عمرك المسك شي ضروري لااازم يكون متواجد في حياتك 

مو بس احنا يالبنات .. كمان الرجال ، اعطي ابوك اخوك زوجك تولة مسك يستخدمها مره في اليوم تكفي 

و لاتستخدمين مسك رخيص .. اشتري من المسك الغالي من اماكن موثوقه زي عبدالصمد القرشي و اجمل و غيرها 

ختاماً : روى مسلم عَنْ أَبِي سَعِيدٍ الْخُدْرِيِّ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : ( الْمِسْكُ أَطْيَبُ الطِّيبِ ) ...

و بس :)

اتمنى اني افدتكم او امتعتكم