شهر رمضان .. اكبر فرصه للتغيير
سلااام :)
كييف حبيبيني الجميلين ؟
انا سبق وحطيت هدف اني ادون بشكل اسبوعي دون انقطاع .. بديت بجد واستمريت .. لكن الجامعه اشغلتني عن التدوين :"(
فـ حالياً احسني راجعه بحمااااس وشوق ماا يمزح :)
مالكم بالطويله : تدوينة اليوم عن التغير في ( رمضان )
اوك اعترف اني بنت ماااااعمرها خططت لشهر رمضان ، اقصد من ناحية التغيير ، يعني دايم افكر بجدول عنايه عشان يجي العيد وانا متغيره وشكلي جميل او افكر في الناحيه الدينيه وكيف اتقرب من ربي اكثثر في هالشهر ..
هذا وضعي كل سنه ، الين قرأت كلام للدكتور وليد فتيحي "ملهمي" كاتب :
نريد من رمضان أن يدخل قلوبنا فيحررها.. نعم أن يحررها. نريد أن يكون رمضان شهر ثورة النفس على النفس.. نريد أن يكون شهر التغيير، فرمضان لم يكن يوماً من أجل رمضان، ولكن من أجل ما بعد رمضان.
هل سيغيرنا رمضان هذا؟ هل ستغيرنا هذه الأيام المعدودات؟ هل سنكون بعد رمضان كما كنا قبل رمضان؟
لو دخل رمضان حقاً قلوبنا لحرَّرها ولما تركنا نعود بعده كما كنا قبله، ففي هذا الشهر الجليل العظيم يتجلى كرم الله بعباده، وتعرض النفحات، وتواتي الفرص، فأبواب الجنة تفتح.. وأبواب جهنم تُغلق.. ومردة الشياطين تسلسل وتصفد.
ما الحكمة من كل هذا؟ إنه فضل أكرم الأكرمين وإحسانه.
لما فكرت فيها لقيت ان فعلاً .. رمضان فرصه جميله للتغيير ، كيف ماعمري فكرت بجديه في التغيير للافضل في هالشهر !!
من بعد ماقريت كلامه قررت اني اخلي رمضان هالسنه باذن الله رمضان مختتلف ، اخلي هالشهر وسيله لتطوير نفسي وذاتي من جميع النواحي ، مو بس الناحيه الروحانيه "الدينيه" .. كل النواحي
فـ امس قررت ابدأ اخطط واستعد لهذا الشهر المنتظر .. خطوت كم خطوه راح اكتبها لكم تحت ، اتمنى انه تحمسكم وتفيدكم زي ما افادتني :)
قرأت مقالات و مواضيع في الانستقرام عن الاستعداد لهذا الشهر .. راح اعطيكم روابط لكل شي قرأته تحت عشان تستفيدون
اولاً مقالات وليد فتيحي : اكككثر شي انصحكم فيها ، يالله يا
هـ اللانسان كيف كلامه يدخخل القلب :"(
و
ثانياً هالمقطع لاحمدالشقيري : مررره اثر فيني وافااادني وحمسني اكيييد
ثالثاً السلسله الجميله اللي سوتها وحده من صديقاتي في الانستقرم : احبها واحب اسلوبها بشككل :"(
حطيت لكم رابط حسابها ، طلوا ع السلسله واكتبوا لها رغد تحبك :)
..
اوك ، انا الحين تحمست ورتبت افكاري ، نجي الحين للتطبيق
اول شي سويته : كتبت في ورقه كل حاجه ابغى اضيفها لنفسي واطورها في هـ الشهر
للامانه حبيت اركز اكثر على الناحيه الروحانيه والناحيه النفسيه
حبيت يكون تغيري في هـ الشهر داخلي اكثر من انه يكون خارجي
فـ كتبت الاهداف اللي في بالي على هيئة نقاط و حرصت ان الاهداف تكون قليله عشان اقدر عليها
بعد ماحددت الهدف صار وقت اني اكتب خطوات تحقق لي هـ الهدف
مثلاً : هدفي اتعلم تدبر القرآن - الخطوات اللي ممكن توصلني له :
- اقرأسبب نزول الايه او قصة السوره
ـ اقرأ في اليوم صفحتين على الاقل بتدببر و بتفسير كامل
و هكذا ...اسوي نفس الشي مع كل هدف انا حددته
بعدها كتبت روتين رمضان المعتاد : فصلّت يومي .. كيف يعني ؟
يعني بديت ارتب فترات اليوم ، حبيت ابدي اليوم من بعد الفطور ، فكتبت كذا :
بعدالفطور الى اذان العشاء ::
بعد التراويح الى الساعه ١٢ ::
بعد الساعه ١٢ الى الساعه ٣ ::
بعد السحور الى ٦ الفجر ::
انـــــــااااام
بعد ما اقوم من النوم الى الفطور ::
فهمتوا كيف الحين
كتبت فترات يومي او اوقات اليوم .. طبعاً هذا روتيني انا المعتاد في رمضان و ممكن يختلف عندكم
المهم ، بعدها اخذ الخطوات اللي كتبتها تحت كل هدف و اوزعها في جدولي ، بحيث اني اعرف ايش اسوي و في اي وقت في اليوم
وبس :)
رتبت لي جدول بسيط ما يكون مضغوط ، استغليت فيه وقت الضايع في رمضان
نصيحه عن تجربه : لما تكوونين حاطه في بالك هدف و منظمه لك جدول من قبل تنامين راح يكون يومك اللي بعده منجزز بشكل ، لانك عارفه ايش تبغين ومتى تبغين تحققين هالشي .. فـ هالله هالله بالجدوله والتخطيط والتنظيم هههههههه
نصايح و معلومات عشوائيه عـ السريع متأكده انها راح تفيد الاغلبيه :
- علمياً : الانسان لو استمر يفعل شي محدد لمدة ٢١ يوم بشكل متواصل .. هـ الفعل راح يصير عاده يوميه صععب الانسان يستغني عنها ، فـ تشوفين دااايم اللي يحبون يطورون انفسهم يرسمون خطط مدة تنفيذها ٢١ يوم ، بحيث ان يلتزم عليها ومااا يوقف ولا يوم عشان يعتاد على هالشي و يتطور .
يعني علمياً كمان يمديييك و براحه تغيرين و تطورين كثييير من شخصيتك في هالشهر
- خففي الفطور قدد ماتقدرين .. قريتوا فوق كلام وليد فتيحي لما حكى عن تأثير الاكل ع الجسم ، فحاولي تخففين ويكون شي صحي عشان ماتحسين بخمول وتفقدين نشاطك
ـ اقرأي القرآن مع تفسير الميسر ، جدداً احبه شرح جميل ومفهوم
يعني لا تفكرين في كم مره راح اختم هـ الشهر !
خلي هدفك انك تفهمين وتستوعبين كلل ايه مرت عليك وحاولي انك تطبقينها على نفسك ، اذكر مره في الثانوي قرأت هـ الجمله في كتاب النحو (( كان الصحابه رضوان الله عليهم لا يتجاوزون ١٠ ايات الا حفظوها و علموا فيها و اين ولماذا انزلت )) مررره لمست قلبي واثرت فيني ، هذا هو التدبر
- بما اني ما احب القراءه ومن زمان نفسي احبها قررت اني اقرأ كتاب اقوم قيلا .. اللي ماتعرفه هو كتاب يتكلم عن تدبر القرآن الكريم نجججح جداً هالكتاب والكل يمدحه فتحمست اقرأه ، عشان اطور من نفسي في القراءه وفي نفس الوقت اتقرب من الله
- ابعدي عن الجوال قد ماتقدرين :
اعرف كثيير بنات في حياتي عندهم ادماان لجوالاتهم ، و مو راضين عن وضعهم هذا ، حاسين انه فعلاً سارق وقتهم لكن مايقدرون يستغنون عنه !
اوك ، زي ماقلنا فوق رمضان فرررصه للتغير
حاولي انك تحرمين نفسك من الجوال لمدة ١٠ساعات مثلاً ، في البدايه بتتعبين لكن راح تتحررين والله
وبسس :)
مبارك عليكم الشهر و كل عام وحبيبيني بالف خير
اتمنى اني افدتكم او امتعتكم
احبكم
XOXO
أنا بالتأكيد اكتسب المزيد من الصعوبات من كل القليل أكثر من المستغرب منه ، بالمناسبة شكرا للمقال. إذا كنت بحاجة إلى عبايات جديد ، فاتصل بنا!
ReplyDelete