بورك لامتي في بكورها .. كيف تستغلين يومك ~

سلااااااام :)

كيف حبيبيني اليوم ؟

موضوع اليوم هو اكثر موضوع صوتوا له امس .. اللي هو كيف تعدلين نظامك وتصيرين تقومين بدري ؟

اللي يتابعوني في السناب يعرفون قد اييش انا بنت صباحيه ! 

وقد ايش اقدر الصباح وقومة الفجر :")

دايم اقوم الفجر ( اما الساعه ٥ او الساعه ٧) حتى في الويك اند او الاجازات .. واتتتعب في رمضان بشككل مايوصف لان النظام ينقلب :(

طبعاً ما ادمنت هالروتين الا بعد ماجربته وشفت قد اييش الوقت يتباااارك ، ماراح تفهمون احساسي وما راح تفهموني الا بعد ماتجربون :)

اتحداكم "تحدي" : بكره طبقوا الخطوات اللي ذكرتها ، وشوفوا اذا ماحللتم يومكم مااكون رغد :)

سنة الحياه كذا ! ربي خلقنا كذا ! 

خلق لنا الليل للنوم والنهار للعيش .. واضحه وصريحه في القرآن في قوله "هو الذي جعل لكم الليل لتسكنوا فيه والنهار مبصرا ، إن في ذلك لآيات لقوم يسمعون".  و غيرها الكثيييير من الايات المؤيده لكلامي .. 

فانتي لما تعكسين السنه وتلخبطين نظامك طبيعي جداً تتعبين حتى لو ماانتي ملاحظه الحين ! ترا صحتك تتعب بدون ما تحسين :(

وطبيعي جداً  ما يتبارك وقتك ! لاتقولين لي : انا كذا ! ربي خلقني كذا احب الليل واحب السهر ! 

مـ ـسـ ـتـ حـ يـ ـل .. لا تقنعيني ، ترا مو طبيعي ابداً  انك تعكسين سنة الله في خلقه ! تنامين وقت العيش وتعيشين وقت النوم ! ارجع واقول ماراح تفهموني الا بعد ماتجربون "تجربون الخطوات اللي بـأذكرها" اكيد جربتوا قبل بس ماتبارك وقتكم او ماكنتم نشيطين 

طولت السالفه وهي قصيره هههههههههههههههه ، راح اعطيكم خطوات انا اسويها في الايام اللي ابغى انجزه فيها  ، انا اذا ابغى انجز لاازم اشتغل في الصبح ، اذا بديت الساعه ١١ او ١٠ احس خلاص ماعاد اعرف اشتغل .. احس يومي خلص خلاص :(

مالكم بالطويله : يالله نبدأ :)

راح ابدأ من الخطوات اللي اسويها من الليل اللي قبل :*)

١- احط في بالي يوم انجز فيه الـ شي اللي انا مأجلته :

كيف يعني ؟ مرات يكون عندي شغله ابغى انجزها .. بس تكون ثقيله على قلبي ومالي خلقها ، فكل يوم ااجلها لليوم اللي بعده .. كيف حليت هالمشكله ؟

ااجل الشغله هذا ليوم بعيد اكون متفرغه فيه .. مثلاً ااجل الشغله للويك اند او لليوم اللي يكون عندي فيه محاضره وحده بس "طبعاً ماعندي اطلاقاً يوم اوف في الجامعه :") افخم يوم هو اليوم اللي فيه محاضره بس ، احس اني مبسوطه و كأن عندي اوف ههههههههههه اصلاً عادي"

ااجل الشغله واخلي في بالي داايم ان في اليوم الفلاني راح انجز الشغله الفلانيه 

مثلاً انا الاسبوع اللي فات كان عندي ماده صعبه كل يوم كنت اقول راح الخصها الليله واستمريت ااجل كل يوم ! فقررت اني اخليها لـ يوم الخميس .. فكل يوم اذكر نفسي واحط في بالي ان الخميس راح الخص هالماده

حتى شوفو المنبه في جوالي ، كل ساعه حطيت منبه يذكرني بالمذاكره عشان اكون حاطه في بالي وماانسى ، فاصير من اوول مااقوم وانا حاطه في بالي ان اليوم راح انجز هالشغله 

حركه بسيطه بس فعااااله 

٢- نامي نومه مريحه ، نومه بطله :

كيف ؟

- اشربي حليب او لبن قبل النوم لان هالشي مثبت علمياً بانه يحسن النوم

- الابحاث الحديثه اثبتت ان من اسباب عندم الارتياح في النوم هو ان الاغلبيه يستعملون جوالاتهم قبل النوم ، فـ هالشي يأثر على نومك

- كل مانمتي بدري كل ماكان افضل : انا اذا جت الساعه ٨ او ٩ الليل وانا مافيني نوم اروح امشي امشي لمده طوييله ، لان عن نفسي بعد المشي اتخدر واحس ابغى انام ههههههههههههههه

في ناس يتخدرون بعد الشاور! 

فانتي سوي اللي يخدرك هههههههههه .. وحاولوا تبعدون عن المنبهات "زي القهوه" قدر المستطاع ، قبل موعد نومك  ب٤ ساعات تقريبا ً

نامو بدري وفي ظلام اذا امكن .. ليه ؟ لان في اجزاء في الدماغ ماتعمل الا في الليل وفي الظلام

فاحرصي على انك تنامين نومه بطله جميل كل يوم :)

واشبببعي نوم ، لان لو قمتي وانتي لسه نعسانه ماراح تنجزين اي شي ابداً ، احرصي انك تاخذين حاجتك اليوميه من النوم 

٣- استغلي كل دقيقه في يومك :

كيف ؟ ببساطه اكتبي TO DO LIST :)

يعني اكتبي لسته فيها المهام اللي تبغين تنجزينها ، بعدين رقمي من الاهم الى الاقل اهميه 

انا احب اكتبها قبل انام في الايام اللي ابغى انجز فيها ، او في الصبح لما مايكون عندي مهام كثير

حاولي ماتكتين مهام كثير فوق طاقتك ، لان لو ماانجزتيها كامله راح تتحطمين 

٤- وقتي "منبهات" :

عن نفسي احط بين كل دقيقتين منبه عشان ماتروح عليه نومه هههههههههه ، وخلي الجوال بعيد عنك عشان تضطرين تقومين 

٥- افتحي الشباك :

اول شي اسويه اول مااقوم هو : افتح الشباك 

مافيه اجمل من برودة الجو في الفجر ، ونسيم الفجر :") 

احب احس ببرودة الجو ، واخذ نفس عميييق .. احس اني اروق 

٩- تقهوي :) :

ركبي قهوه عربي او تركي او اي نوع .. خطوه سخيفه والغالب يسويها هههههههههه بس ما استغنى عنها ابد

عن نفسي مايصحصحني الا القهوه العربيه وهي حاااره لسه جديده ، اكيّف

١٠- رتبي غرفتك :

عشان تنفتح نفسك وتعرفن تنجزين  لان المحيط يلعب دور كبيير

١١- دوري للالهام :

 وانتي تتقهوين ، والغرفه مرتبه ، والشباك مفتوح والهوا البارد الجميل داخل للغرفه .. تفرجي او اقري شي ملهم 

يالله يامفعولها كيف جبار 

اعتقد مااااايحتاج اقول لكم مين ملهمي هههههههههههههه اكيد اكيد اكـ يـ ـد الدكتور وليد فتيحي

١٢- عناية الصباح :

لما اغسل وجهي واسوي روتيني في الصباح والله اتنشط ، حتى مرات في نص اليوم اذا انا مكسله اروح اسوي روتين الصباح عشان اروق :)

اكثر اشياء تروقني : لما اغسل وجهي بمويه بارده / ولما استعمل غسول الفم / ولما استعمل مقشر الوجه البببببطل هذا 

يناسب كلل البشرات الا الحساسه و يستعمل يومياً عادي 

١٣- الرياضه او اليوغا :

لما ابدأ يومي برياضه و يوغا احس اني اصحصح واتنشط بشككل !

ما راح اعمم ، انا عندي فديوين بس واحد يوغا وواحد لرياضة الصباح

لما اسويهم احس اني اصحصح ، لما اسوي غيرها احسني اتعب .. لكن للاسف من بدت الاختبار وانا منقطعه عنها :(

هذا فديو اليوغا : https://www.youtube.com/watch?v=yIrpzESHhGE

هذا فديو رياضة الصباح : https://www.youtube.com/watch?v=ccWj9RQIkt8

كلهم ينشطون الدوره الدمويه فبالتالي تتنشطين بعدهم :)

بسس :)

وبكذا خلص الموضوع 

حاولت قد ما اقدر اني اكتب اكثر خطوات فادتني ، حتى ولو بسيطه

اتمنى اني افدتكم او امتعتكم :)

احبكم 

xoxo